Սեւանի ափին պետությունից ու հայրենասիրությունից խոսողները տեղյա՞կ էին

Հակոբ Բադալյան

Հայաստանի երկրորդ եւ երրորդ նախագահները անցնող օրերի ընթացքում Սեւանի ափին հանդիպել են իրենց համակիր երիտասարդների հետ, պատասխանել նրանց հարցերին, խոսել հայրենասիրությունից, ազգային արժեքներից, պետությունից եւ այլն:

Այդ խոսակցությունը ծավալվել է խիստ խորհրդանշական տեղում՝ Սեւանի ափին, որը Հայաստանում նախկին կառավարող համակարգի հայրենասիրության, ազգային արժեքների եւ հարստության հանդեպ հոգատարության, օրենքի նկատմամբ հոգատարության վառ դրսեւորում է, կամ ավելի շուտ՝ պերճանք եւ թշվառություն:

Պերճանք այն իմաստով, թե այդ համակարգի ամենատարբեր ներկայացուցիչներ ինչեր են կառուցել Սեւանի ափին, թույլատրելի բացարձակ նիշից ներքեւ, եւ թշվառություն գործնականում նույն իմաստով, թե ինչպիսին է եղել իրապես ազգային արժեքի եւ հարստության, ջրային մեծ ավազանի՝ Սեւանի հանդեպ վերաբերմունքը:

Հետք էլեկտրոնային պարբերականը հրապարակել է հոդված, թե նախկին համակագի որ ներկայացուցիչներն ինչ ունեն Սեւանի ափին, բացարձակ նիշից ներքեւ, որը չպետք է չլիներ եւ ենթակա է քանդման: Այդ ցանկում են մարդիկ, որոնք այսօր ամենից բարձր են խոսում ազգային արժեքներից, օրինականությունից, հայրենասիրությունից, կրթության ազգայինից եւ այլն: Այդ ցանկում են ԲՀԿ նախագահ Գագիկ Ծառուկյանը, ՀՖՖ նախկին նախագահ Ռուբեն Հայրապետյանը, տարբեր այլ գործիչներ, նախկին գլխավոր դատախազի մերձավոր, Երեւանի նախկին քաղաքապետ, եւ նաեւ մի ներկա՝ ըստ թերթի: Ցանկում է նաեւ ԵԿՄ նախագահ եւ Իմ քայլի պատգամավոր Սասուն Միքայելյանի անունը:

Օրերս մի սկանդալ էլ ծագեց նախկին ոստիկանապետ Վովա Գասպարյանի ամառանոցի առնչությամբ:

Սեւանի պարագայում սակայն խնդիրը լոկ թույլատրելի կամ անթույլատրելի նիշը չէ: Ի վերջո թույլատրելի նիշը հարց չի լուծում, որովհետեւ կա նաեւ ուղղակի արժեհամակարգային, բարոյական խնդիր, թե ինչպես է ուղղակիորեն յուրացվել ազգային հարստություն Սեւանի ափը, անխնա, անկուշտ մոլուցքով: Սեւանն այդ իմաստով մերկացնում է նախկին կառավարող համակարգը թե իրավական, թե քաղաքական, թե արժեհամակարգային ու բարոյական իմաստով:

Սեւանի ափին պետությունից, հայրենասիրությունից եւ կազմակերպվածությունից խոսող նախկին նախագահները տեղյա՞կ էին, թե իրենց իշխանության ընթացքում ինչ է կատարվել: Թե՞ իշխանություն եղած ժամանակ ազգային արժեքների մասին մտածելու ժամանակ չկա, դրա մասին մտածել սկսել են իշխանությունը կորցնելուց հետո:

Աղբյուրը՝ Lragir.am