Պուտինն Ու Թրամփը Չեն Վստահում Միմյանց

Ռայանը պնդում է, որ Թրամփի միջնորդությամբ կնքված խաղաղության պայմանագիրը պետք է հաշվի առնի նախորդ անհաջող համաձայնագրերի դասերը, օրինակ՝ Վերսալի պայմանագիրը, որը կնքվեց Առաջին համաշխարհային պատերազմից հետո և, ըստ պատմաբանների, նպաստեց Ադոլֆ Հիտլերի և նացիստական Գերմանիայի վերելքին։

Fox News. Նույնիսկ եթե Թրամփը խաղաղության պայմանագիր կնքի Ուկրաինայի և Ռուսաստանի միջև, կարելի՞ է վստահել Պուտինին։
«Ռուսաստանի ռազմական-ռազմավարական մտածողության մեջ «խաղաղություն» հասկացություն գոյություն չունի։ Դուք մշտական առճակատման մեջ եք», — նախազգուշացնում է ԱՄՆ Պաշտպանության նախարարության հետախուզության նախկին աշխատակիցը։ Պուտինի օրոք Ռուսաստանը բազմիցս խախտել է միջազգային պաշտոնական համաձայնագրերը, որոնք նպատակ ունեն նախևառաջ պաշտպանել Ուկրաինայի ինքնիշխանությունը նրա նախկին խորհրդային տիրակալի ազդեցությունից։
Որոշ համաշխարհային առաջնորդներ և անվտանգության ծառայությունների ներկայացուցիչներ, այդ թվում՝ Ուկրաինայի նախագահ Վլադիմիր Զելենսկին, նախազգուշացնում են, որ Ռուսաստանի և Ուկրաինայի միջև խաղաղության համաձայնագիր մոտ ապագայում քիչ հավանական է, և որ Պուտինը չի պահպանելու որևէ միջազգային պայմանավորվածություն՝ առանց Արևմուտքի լուրջ անվտանգության երաշխիքների։
«Խնդիրն այն է, որ ռուսները ընկալում են արդյունքը միայն հաղթանակ-պարտություն տրամաբանության մեջ, ինչը նշանակում է, որ Ուկրաինայի վրա այլևս չհարձակվելու համար նրանք պետք է համարեն, որ պատերազմում պարտվել են, ինչպես դա եղավ Սառը պատերազմի ավարտին», — Fox News Digital-ին ասել է Մայքլ Ռայանը, ԱՄՆ Պաշտպանության նախարարության եվրոպական քաղաքականության և ՆԱՏՕ-ի քաղաքականության նախկին փոխտեղակալը և միջազգային անվտանգության հարցերով նախկին պաշտոնակատար։
Fox News Digital-ի կողմից հարցված անվտանգության ծառայությունների ներկայացուցիչները պնդում են, որ Ուկրաինայի ապագան երաշխավորելու համար Պուտինին «վստահելու» մասին խոսք լինել չի կարող։ Խոսքն այն մասին է, որ Ռուսաստանը պետք է դրվի այնպիսի պայմանների մեջ, որտեղ ցանկացած ապագա խախտում նրան ավելի մեծ վնաս կպատճառի, քան կարող են գայթակղել չվերահսկվող հնարավորությունները։
«Նույնիսկ եթե պայմանագիր կնքվի, Ռուսաստանը կշարունակի գաղտնի գործողություններ իրականացնել ամբողջ աշխարհում՝ իր աշխարհաքաղաքական ազդեցությունը մեծացնելու համար», — Fox News Digital-ին ասել է Ռեբեկա Քոֆլերը, ԱՄՆ Պաշտպանության նախարարության հետախուզության նախկին աշխատակիցը։ Նա նշել է, որ նախկին ԿԳԲ-ի աշխատակիցը կշարունակի ընտրություններին միջամտելու, կիբերպատերազմի, լրտեսության և աշխարհում ապակայունացման գործողությունների արշավները։
Ռայանը պնդում է, որ Թրամփի միջնորդությամբ կնքված խաղաղության պայմանագիրը պետք է հաշվի առնի նախորդ անհաջող համաձայնագրերի դասերը, օրինակ՝ Վերսալի պայմանագիրը, որը կնքվեց Առաջին համաշխարհային պատերազմից հետո և, ըստ պատմաբանների, նպաստեց Ադոլֆ Հիտլերի և նացիստական Գերմանիայի վերելքին։
«Ինչպե՞ս լուծել այս բարդ խնդիրը։ Ինչպես Երկրորդ համաշխարհային պատերազմի ավարտից հետո… Ուկրաինայի վերականգնումը պետք է ներառի տնտեսական հաշտեցում Ռուսաստանի հետ… Ռուսները տեսել են, թե ինչպես ենք մենք վերականգնել պարտված կողմերին Երկրորդ համաշխարհային պատերազմից հետո՝ Գերմանիային և Ճապոնիային։ Նրանք ակնկալում էին, որ մենք նույնն կանենք Ռուսաստանի համար Սառը պատերազմից հետո, բայց մենք դա չարեցինք», — ասել է Ռայանը։ «Մենք չենք կարող կրկնել նույն սխալը, եթե ցանկանում ենք Ուկրաինայում հաստատուն խաղաղություն և եթե ցանկանում ենք Ռուսաստանին հեռացնել Չինաստանի ազդեցությունից», — հավելել է նա՝ նշելով, որ մյուս մրցակից երկրներն ուշադիր հետևում են, թե ինչպես Արևմուտքը կհաղթահարի այս աշխարհաքաղաքական մարտահրավերը։
Հուդզոնի ինստիտուտի Եվրոպայի և Եվրասիայի կենտրոնի ավագ գիտաշխատող և տնօրեն Փիթեր Ռաֆի խոսքով՝ Թրամփի վարչակազմի բանակցությունների ճանապարհին բազմաթիվ խոչընդոտներ կան, այդ թվում՝ օկուպացված տարածքների կարգավիճակի շուրջ վեճերը, այդ տարածքների միջազգային ճանաչումը, միջազգային օգնությունն ու Ուկրաինայի աջակցությունը, սառեցված ռուսական ակտիվների բռնագրավումը, Զելենսկու դիրքն Ուկրաինայում, ռազմագերիների վերադարձը և առևանգված ուկրաինացի երեխաների վերադարձի հարցը։
«Պուտինը պաշտոնապես անեքսիայի է ենթարկել Ուկրաինայի չորս մարզերը, ինչպես նաև Ղրիմը։ Սակայն Մոսկվան դեռ ամբողջությամբ չի գրավել այդ չորս մարզերից ոչ մեկը… Չեմ պատկերացնում, որ Ուկրաինան կհրաժարվի իր վերահսկողության տակ գտնվող տարածքներից, քանի որ նա կյանքի գնով պայքարել է դրանց համար», — ասել է Ռաֆը Ուկրաինա կատարած իր այցի ընթացքում։
«Ես նաև կասկածում եմ, որ Արևմուտքը պաշտոնապես կհամաձայնի ճանաչել Մոսկվայի վերահսկողության տակ գտնվող տարածքները… Այսպիսով, Պուտինը ստիպված կլինի ընդունել այս ամենը խաղաղության պայմանագրում», — հավելել է նա։
«Պուտինը դժվար թե որևէ զիջման գնա, քանի որ կարծում է, որ ուժեղ դիրքում է… Նա հավատում է, որ Ռուսաստանը պատրաստ է պատերազմել մինչև վերջին ուկրաինացին և մինչև ՆԱՏՕ-ի զինանոցում եղած վերջին հրթիռը… Նա դժվար թե համաձայնվի հրադադարի, որովհետև չի ցանկանում ռազմավարական դադար տալ Ուկրաինային, ԱՄՆ-ին և ՆԱՏՕ-ին՝ վերազինվելու համար… Նա չի վստահում Վաշինգտոնին։ Նա Թրամփին չի վստահում այնքան, որքան մենք չենք վստահում Պուտինին», — ասել է Ռեբեկա Քոֆլերը Fox News Digital-ին տված հարցազրույցում։
«Նա Թրամփին վստահում է նույնիսկ ավելի քիչ, քան Բայդենին, որովհետև կարողանում էր «կարդալ» Բայդենին և կանխատեսել նրա պահվածքը։ Իսկ Թրամփին չի կարող «կարդալ», քանի որ նա անկանխատեսելի է», — հավելել է Քոֆլերը։

Աղբյուրը՝
https://www.foxnews.com/world/even-trump-secures-ukraine-russia-peace-deal-can-putin-trusted