Նա ակնարկել էր, որ ԱՄՆ-ն կարող է միանալ Եվրոպային՝ Ռուսաստանի էներգակիրների արտահանման և բանկային գործարքների դեմ ուղղված պատժամիջոցներին։
The Wall Street Journal
The Wall Street Journal-ը գրում է, որ Թրամփը եվրոպացի առաջնորդների հետ փակ զրույցում հայտարարել է, որ Պուտինը պատրաստ չէ դադարեցնել պատերազմը
Երկուշաբթի կայացած հեռախոսազրույցի ընթացքում նախագահ Թրամփը եվրոպացի առաջնորդներին ասել է, որ Վլադիմիր Պուտինը չի պատրաստվում դադարեցնել Ուկրաինայի պատերազմը, քանի որ կարծում է՝ հաղթում է։ Այդ մասին հայտնել են երեք աղբյուրներ, որոնք ծանոթ են զրույցի բովանդակությանը։
Այս խոստովանությունը համընկնում է եվրոպացի ղեկավարների վաղուց եղած մտավախությունների հետ՝ կապված Պուտինի մտադրությունների հետ, բայց առաջին անգամ էր, որ այն լսվում էր հենց Թրամփից։ Դա նաև հակասում էր Թրամփի՝ հրապարակային ելույթներում հնչեցրած տեսակետին, ըստ որի՝ Պուտինը իբր խաղաղություն է ցանկանում։
Երկուշաբթի կայացած հեռախոսազրույցին մասնակցել են Վլադիմիր Զելենսկին, Էմանուել Մակրոնը, Ֆրիդրիխ Մերցը, Ջորջա Մելոնին և Ուրսուլա ֆոն դեր Լայենը։ Սա մասամբ եվրոպական դիվանագիտական հարձակման գագաթնակետին էր, որը սկսվել էր մոտ տասը օր առաջ՝ Թրամփին ստիպելու Պուտինի վրա ճնշում գործադրել։
Թեև այդ ջանքերը ի վերջո չհանգեցրին Թրամփի կողմից լրացուցիչ պատժամիջոցների կիրառմանը, եվրոպացիները դրանում տեսան նաև դրական կողմ։
Այս գործընթացը բոլորին, ներառյալ Թրամփին, օգնել է հասկանալու Պուտինի դիրքորոշումը՝ այս փուլում նա պատրաստ չէ դադարեցնել պատերազմը։ Իսկ եվրոպացիներին սա օգնել է գիտակցել, որ այժմ Ուկրաինային աջակցելու հիմնական պատասխանատվությունն իրենց վրա է։ Աղբյուրների խոսքով՝ եվրոպացիները չեն կարծում, թե Թրամփի վարչակազմը կդադարեցնի Ուկրաինային զենքի արտահանումը, քանի դեռ դրա դիմաց վճարում են Եվրոպան կամ Կիևը։
Կիրակի օրը Թրամփը՝ զրուցելով եվրոպացի ղեկավարների, այդ թվում՝ Մակրոնի, Մերկելի, Մելոնիի և Ստարմերի հետ, ակնարկել է, որ պատրաստվում է բանակցությունների ուղարկել պետքարտուղար Մարկո Ռուբիոյին և հատուկ բանագնաց Քիթ Քելլոգին, որոնք հավանաբար տեղի կունենան Վատիկանում։ Զրույցին մասնակցածներից մեկի խոսքով՝ երկուշաբթի Թրամփը կարծես թե հստակ պարտավորություններ չի ստանձնել ԱՄՆ-ի դերի վերաբերյալ։
Եվրոպացի որոշ առաջնորդներ, որոնք մասնակցել են երկուշաբթի օրը կայացած հեռախոսազրույցին, պնդել են, որ Վատիկանում նախատեսվող բանակցությունների արդյունքը պետք է լինի անպայման կրակի դադարեցում։ Բայց Թրամփը կրկին առարկեց՝ ասելով, որ իրեն դուր չի գալիս «անպայման» բառը։ Նա նշել է, որ երբեք չի օգտագործել այդ բառը, թեև մայիսի 8-ին Truth Social հարթակում իր հրապարակման մեջ այն օգտագործել էր՝ կոչ անելով 30-օրյա հրադադարի։
Ի վերջո, եվրոպացիները համաձայնվել են հրաժարվել իրենց պահանջից։
Եվրոպայի դիվանագիտական ճնշումը՝ ուղղված Թրամփին՝ ստիպելու նրան ազդեցություն գործադրել Ռուսաստանի վրա, ուժգնացավ այս ամսվա սկզբին, երբ իշխանության եկավ Գերմանիայի նոր պահպանողական կանցլեր Ֆրիդրիխ Մերցը։
Մերցն ավելի պատրաստակամ է դիմակայել Պուտինին, քան իր ձախակողմյան նախորդը՝ Օլաֆ Շոլցը։ Եվ, ինչը հատկապես կարևոր է, Մերցի կոալիցիան աջակցել է Գերմանիայի սահմանադրության մեջ կատարված փոփոխություններին, որոնք երկրին շատ ավելի լայն հնարավորություն են տալիս ռազմական նպատակների և Ուկրաինայի աջակցության համար միջոցներ ներգրավելու հարցում։
Երբ կիրակի օրը Թրամփը զրուցում էր եվրոպացի առաջնորդների հետ՝ մինչև Պուտինի հետ նախատեսված հեռախոսազրույցը, նա ակնարկել էր, որ ԱՄՆ-ն կարող է միանալ Եվրոպային՝ Ռուսաստանի էներգակիրների արտահանման և բանկային գործարքների դեմ ուղղված պատժամիջոցներին։
Այդ զրույցում նկատվել է Թրամփին բնորոշ իմպրովիզացիոն ոճը, որտեղ նա միախառնել է գովասանքն ու քննադատությունը եվրոպացի առաջնորդների հասցեին։ Նա գովել է Ֆրիդրիխ Մերցին՝ անգլերենի գերազանց իմացության համար։ «Նրան էլ ավելի եմ հավանում՝ ձեր գերմանական ակցենտով», — ասել է Թրամփը՝ զրույցի մասնակիցներից մեկի խոսքերով։
Մեկ այլ պահի Թրամփը շեղվել է թեմայից և խիստ քննադատության է ենթարկել Եվրոպայի միգրացիոն քաղաքականությունը՝ հայտարարելով, որ անկառավարելի միգրացիան նրանց երկրները «հասցնում է կործանման եզրին»։
Մակրոնը, ով Թրամփի հետ ունի ամենից երկարատև հարաբերությունները, փորձել է նրան կանգնեցնել։ «Դու չես կարող վիրավորել մեր երկրները, Դոնալդ», — ասել է Մակրոնը՝ զրույցին ներկա անձի փոխանցմամբ։
Սակայն ընդհանուր առմամբ զրույցի տոնն, ըստ աղբյուրների, եղել է դրական։ Որոշների մոտ տպավորություն էր ստեղծվել, թե Թրամփը կարող է աջակցել նոր պատժամիջոցներին, եթե Պուտինը չհամաձայնի հրադադարին։ Բայց այդ հույսերը հաջորդ օրը ի դերև ելան։
Վատիկանում բանակցությունները, ըստ ակնկալիքների, կմեկնարկեն հունիսի կեսերին։
Աղբյուրը`