Հատկանշական եւ հիշարժան է, որ նախորդ տարի հարավաֆրիկյան հանրապետությունում կայացած ԲՐԻԿՍ գագաթնաժողովին մասնակցելու ցանկություն հայտնել էր հենց Ֆրանսիայի նախագահ Մակրոնը, ինչը սակայն տեղի չունեցավ Ռուսաստանի հետ տարաձայնությունների պատճառով:
Հակոբ Բադալյան
Հայաստանում Ֆրանսիայի դեսպան Օլիվյե Դըկոտինյին հայտնել է, որ Հայաստանի վարչապետ Նիկոլ Փաշինյանը հրավիրվել է Ֆրանսիայում կայանալիք Ֆրանկոֆոնիայի գագաթնաժողովին: Գագաթնաժողովը տեղի կունենա հոկտեմբերի 4-5-ին: Տեւական ժամանակ տարբեր խոսակցություններ ու մամուլի ոչ պաշտոնական հրապարակումներ էին շրջանառվում այն մասին, որ սեպտեմբերի 21-ին Հայաստան կժամանի Ֆրանսիայի նախագահ Էմանուել Մակրոնը:
Սեպտեմբերի 15-16-ին Հայաստան ժամանեց Ֆրանսիայի արտգործնախարար Ստեֆան Սեժուրնեն, ինչն ի դեպ նրա թերեւս վերջին այցն էր Հայաստան այդ կարգավիճակում: Եվրահանձնաժողովի նախագահ Ուրսուլա Ֆոն Դեր Լայենը հայտնել է, որ Սեժուրնեն կնշանակվի Եվրահանձնաժողովի փոխնախագահ՝ տնտեսական զարգացման հարցերով: Սեժուրնեի հայաստանյան այցի ընթացքում որեւէ խոսք չի եղել Մակրոնի հնարավոր այցի մասին: Փոխարենը հայտնի է դառնում, որ Հայաստանի վարչապետն է հրավիրվել Ֆրանկոֆոնիայի գագաթնաժողովին: Կասկածից վեր է, որ Նիկոլ Փաշինյանը կընդունի հրավերը:
Ընդ որում, այդ համատեքստում ուշագրավ է Սեժուրնեի այցը: Ըստ էության, փաստացի ստացվում է, որ այդ այցը Ֆրանկոֆոնիայի վեհաժողովին Նիկոլ Փաշշինյանի այցը «նախապատրաստող» այցելություն էր: Խոսքը թերեւս վերաբերում է քաղաքական բովանդակությանը: Ստեֆան Սեժուրնեն Երեւանում թերեւս քննարկել է հարցեր, թեմաներ, օրակարգ, որի շուրջ առավել ծավալուն խոսակցություն կլինի արդեն Նիկոլ Փաշինյանի ու Մակրոնի միջեւ Ֆրանսիայում՝ հոկտեմբերի սկզբին:
Միաժամանակ ստացվում է նաեւ, որ հոկտեմբերի սկզբին Նիկոլ Փաշինյանը կմասնակցի Ֆրանկոֆոնիայի գագաթնաժողովին Ֆրանսիայում, իսկ հոկտեմբերի վերջին նա կմասնակցի Կազանում կայանալիք ԲՐԻԿՍ գագաթնաժողովին: Կլինի՞ արդյոք թեմատիկ հաջորդականություն՝ ժամանակագրականից զատ, բարդ է ասել:
«Բազային նախադրյալներ» անշուշտ առկա են, հաշվի առնելով ֆրանսիական արտաքին քաղաքականության ուշագրավ մի շարք շեշտադրումներ, նաեւ ֆրանսիական ռազմավարության էական հանգամանքներ: Ի վերջո, հատկանշական եւ հիշարժան է, որ նախորդ տարի հարավաֆրիկյան հանրապետությունում կայացած ԲՐԻԿՍ գագաթնաժողովին մասնակցելու ցանկություն հայտնել էր հենց Ֆրանսիայի նախագահ Մակրոնը, ինչը սակայն տեղի չունեցավ Ռուսաստանի հետ տարաձայնությունների պատճառով:
Հոդվածը՝ 1in.am կայքից։