Իսմայլովը ֆեյսբուքի անձնական էջում գրել է, որ յուրաքանչյուր ընտանիքի, կախված անդամների թվից, իշախնությունները հատկացնում են ընդամենը 500‑1000 քառակուսի մետր հող, որ չի բավարարում «թռչուններ, մանր եւ խոշոր եղջերավոր անասուն պահելու եւ գյուղատնտեսական մթերքներ աճեցնելու համար»:
Վահրամ Աթանեսյան
Իլհամ Ալիեւը սեպտեմբերի 14–15-ին գտնվել է բռնազավթված Արցախում: Բաքվի պաշտոնական քարոզչությունը ներկայացնում է նրա խոսքը, որ «Ղարաբաղում իրականացվող շինարարությունն իր ծավալներով աշխարհում աննախադեպ է»: Եվրոպայում ադրբեջանական վտարանդիության ներկայացուցիչներից լրագրող Գանիմեդ Զահիդովը ծաղրել է այդ քարոզչությունը: Նրա տեղեկություններով, Բաքվում, Սումգայիթում եւ Ապշերոնի շրջանի քաղաքամերձ ավաններում հաստատված մարդիկ Ալիեւի «կառուցած դրախտում ապրելու ոչ մի ցանկություն չունեն, որովհետեւ դա նրանց համար հայրենիք չէ»:
Զահիդովը վկայակոչում է փաստը, որ ալիեւյան բնակավայրերում իշխանության քաղաքացիական մարմիններ ձեւավորված չեն, «չկան մունիցիպալիտետներ՝ ինչպես օրենքն է պահանջում, փոխարենը բոլոր տեղերում վխտում են հատուկ ծառայությունների եւ ոստիկանության աշխատակիցները»: Վտարանդի լրագրողը տեղեկացնում է, որ ոչ մի բնակավայրում «հողի սեփականաշնորհում չի իրականացվել, իսկ եթե մարդ զրկված է հողից, ապա ո՞րն է նրա հայրենիքը»:
Որքան էլ արտառոց չհնչի, Զահիդովի դիտարկումները հաստատել է Բաքվում հայտնի փաստաբան Ասլան Իսմայլովը, որին իշխանությունները թույլատրել են այցելել «ազատագրված տարածքներ»: Իսմայլովը ֆեյսբուքի անձնական էջում գրել է, որ յուրաքանչյուր ընտանիքի, կախված անդամների թվից, իշախնությունները հատկացնում են ընդամենը 500‑1000 քառակուսի մետր հող, որ չի բավարարում «թռչուններ, մանր եւ խոշոր եղջերավոր անասուն պահելու եւ գյուղատնտեսական մթերքներ աճեցնելու համար»: Փաստաբանը գրել է նաեւ, որ ալիեւյան կառավարությունը «վերաբնակված» ընտանիքներին ամսական վճարում է 300–400 մանաթ եւ «պարտադրում, որ մնան տեղում»:
Ալիեւյան բնակավայրերում չկա աշխատանք, մարդիկ մեծ դժվարությամբ են համաձայնում այնտեղ բնակություն հաստատել: Իսմայլովը եզրակացնում է, որ եթե խնդիրները չլուծվեն, ապա Ալիեւի հռչակած «մեծ վերադարձ» ծրագիրը հազիվ թե իրականություն դառնա: