Սկզբունքային համաձայնություն տալով Ռուսաստան-Իրան տրանսպորտային հաղորդակցության տրանզիտի ապահովմանը, Բաքուն, կարծես, Թեհրանին «ինչ-որ պահանջ է ներկայացրել»: Մարտի 18-ին Իրանի եւ Ռուսաստանի նախագահների հեռախոսազրույցի ընթացքում Ռաիսին ակնարկել է, որ Հարավային Կովկասում իրավիճակը եւ զարգացումները «զգայուն են, եւ Թեհրանը հաստատակամ է՝ պաշտպանելու իր ազգային շահերը»: Ի՞նչ «զարգացումներ» է դիտարկել Իրանը: Խոսքը ռուս-ադրբեջանական՝ Իրանին անհանգստացնող պայմանավորվածությունների՞ մասին է, թե՞ Թեհրանը դիտարկում է Արեւմուտքի հետ «ադրբեջանական խաղ»:
Վահրամ Աթանեսյան
«Թուրանը» ծաղրում է Ալիեւին. Բաքուն կհակադարձի՞
Ադրբեջանի ԱԳՆ-ում «անթույլատրելի» են անվանել Ֆրանսիայի արտաքին գործերի նախարար Սեժուրնեի «մեղադրանքները»: Այհան Հաջիզադեն «անընդունելի է համարում Ֆրանսիան ներկայացնել որպես խաղաղասեր երկիր, նա Փարիզին կոչ է արել ձեռնպահ մնալ նման հայտարարություններից»- անդրադառնալով ԱՄՆ պետքարտուղարի հետ մամուլի ասուլիսին Ֆրանսիայի արտաքին գործերի նախարարի՝ Ադրբեջանի ռազմատենչ հռետորաբանությանը հակազդելու անհրաժեշտության մասին դիտարկմանը պաշտոնական Բաքվի արձագանքին, գրում է «Թուրան» գործակալությունը:
Միաժամանկ Ադրբեջանի արտաքին գործերի նախարարությունը չի մեկնաբանում Իրանի խորհրդարանի պատգամավորի սկանդալային հայտարարությունը, որով նա կոչ է արել հրթիռային հարված հասցնել Բաքվում Իսրայելի դեսպանատանը,-շարունակում է ադրբեջանական լրատվամիջոցը եւ մեջբերում իրանցի խորհրդարանականի սոցցանցային գրառումը. «Սիոնիստական ռեժիմի հարձակման համրաժեք պատասխանի ուշացումը հվասարազոր կլինի Իրանի հեղինակությանը ծանր հարվածին: Իմ առաջարկությունն այն է, որ պետք է բաց հարձակում գործել տարածաշրջանում սիոնիստների դիվանագիտական ներկայացուցչություններից մեկի դեմ, նախընտրելի է՝ Ադրբեջանում»:
Ադրբեջանական լրատվամիջոցը, որ, թերեւս, այդ երկրում ամենահեղինակավորն է, փաստացի ծաղրում է Իլհամ Ալիեւին: Ընդ որում, շատ նուրբ ակնարկ է արված, որ Ֆրանսիայի արտգործնախարարի հայտարարությանն ԱԳՆ խոսնակի մակարդակով արձագանքը բացառապես քարոզչական է, իրականում Ֆրանսիան Ադրբեջանի համար սպառանալիք չէ, իսկ Իրանի խորհրդարանի պատգամավորի սոցցանցային գրառումը չէր կարող նրա «գեղարվեստական ստեղծագործությունը» լինել: Էականը, թերեւս, այն է, թե ինչ չի ասում «Թուրանը»: Այսինքն՝ ի՞նչ հիմնավորում ունի իրանցի պատգամավորը, երբ առաջարկում է հրթիռային հարված հասցնել Բաքվում Իսրայելի դեսպանատանը:
Բաքվում Իրանի դեսպան Մուսավին օրերս վերադարձել է Թեհրան: Պաշտոնապես հայտարարվել է, որ նա ավարտել է դիվանագիտական առաքելության սահմանված ժամկետը: Բայց խիստ ուշագրավ է, որ մինչ այդ նա անոնսավորել էր «Նավրուզի տոնակատարության շրջանում Իրանի եւ Ադրբեջանի նախագահների հանդիպում»: Ընդ որում՝ իրանա-ադրբեջանական սահմանի՝ Հոդափերինի կամրջին հարող հատվածում: Այդ հանդիպումը չկայացավ, որեւէ մեկնաբանություն, թե ինչու՞ Ռաիսին եւ Ալիեւը չեն կազմակերպել «Հոդափերին» եւ «Կույսի աշտարակ» ջրամբարների շահագործման հանձնելու արարողություն՝ չի հնչել:
Տարեսզբին բոլոր առումներով արտառոց տեղեկություն էր տարածվել, որ Բաքվում Իսրայելի դեսպանատան նստավայրում Ադրբեջանի «ՆԳՆ եւ այլ ուժային կառույցների աշխատակիցների մասնակցությամբ կազմակերպվել է դիպուկահարների զորավարժություն»: Կա՞ր տեղեկություն, որ «ահաբեկչություն է նախապատրաստվում»՝ դժվար է ասել, բայց փաստը չափազանց խոսուն է, ինչպես եւ այն, որ չնայած երկկողմ հավաստիացումներին՝ Ադրբեջանն այդպես էլ առայսօր չի վերականգնել Թեհրանում իր դեսպանի գործունեությունը:
Սկզբունքային համաձայնություն տալով Ռուսաստան-Իրան տրանսպորտային հաղորդակցության տրանզիտի ապահովմանը, Բաքուն, կարծես, Թեհրանին «ինչ-որ պահանջ է ներկայացրել»: Մարտի 18-ին Իրանի եւ Ռուսաստանի նախագահների հեռախոսազրույցի ընթացքում Ռաիսին ակնարկել է, որ Հարավային Կովկասում իրավիճակը եւ զարգացումները «զգայուն են, եւ Թեհրանը հաստատակամ է՝ պաշտպանելու իր ազգային շահերը»: Ի՞նչ «զարգացումներ» է դիտարկել Իրանը: Խոսքը ռուս-ադրբեջանական՝ Իրանին անհանգստացնող պայմանավորվածությունների՞ մասին է, թե՞ Թեհրանը դիտարկում է Արեւմուտքի հետ «ադրբեջանական խաղ»:
Եւ ինչու՞ է «Թուրանը» ծաղրում Ալիեւին կամ ինչու՞ Ադրբեջանն իրանցի պատգամավորի իրոք սկանդալային հայտարարությանը գոնե Միլլի մեջլիսի մակարդակով չի հակադարձել: Կհակադարձի՞:
Հոդվածը՝ 1in.am կայքից։