Մոմ Վառե՞նք «Արցախբանկի» Համար
Ի՞նչ անի բռնատեղահանված արցախցին, «Արցախբանկ» ՓԲԸ‑ի «կառավարչի» եւ բաժնետերերի համար եկեղեցում մոմ վառի՞, հանապազօր աղոթի նրան արեւշատության համա՞ր, որ այդքան «գթասիրտ եւ մեծահոգի են»: Արցախի «պետնախարարն» անոնսավորել է, որ ապրիլի սկզբից «փողոցային շարժում է սկսելու»: Հանուն ինչի՞:
Վահրամ Աթանեսյան
Արցախի «պետնախարար» Նժդեհ Իսկանդարյանը մամուլի ասուլիս է անցկացրել եւ իր գլխավորած «Բարեգործական հիմնադրամի» գործունեության մասին որոշ տեղեկություններ հայտնել: Նա թվարկել է նվիրատուների անուններ, նշել հատկացված գումարի չափեր: Ուշադրության է արժանի, որ նա այդ շարքում նշել է նաեւ «Արցախբանկ» ՓԲԸ‑ն, որ, ինչպես պարզվում է, հատկացրել է 1 միլիոն 600 հազար… դրամ:
Այս գումարը ոչ միայն զավեշտ, այլեւ բռնատեղահանված արցախցիների հասցեին ծաղր է: Ամենայն հավանականությամբ, դա «Արցախբանկ» ՓԲԸ‑ի, ինչպես Ստեփանակերտում կասեն՝ «կառավարչի» մեկ ամսվա աշխատավարձը չգերազանցող գումար է: Որքա՞ն նվիրատվություն են արել մյուսները, իրենց խնդիրն է: «Արցախբանկ» ՓԲԸ‑ի պարագան բոլորովին այլ է: Այդ բանկը ստեղծվել է 1996թ. նոյեմբերի 6‑ին: Բաժնետերերի ընդհանուր ժողովը որոշել է կազմավորել «Արցախբանկ» բաց բաժնետիրական ընկերություն:
Բաց աղբյուրները չեն ասում, թե ովքե՞ր էին ԲԲԸ հիմնադիրները, բայց Լեռնային Ղարաբաղի Հանրապետության կառավարությունը չէր կարող չլինել «վերահսկիչ փաթեթը տիրապետող» բաժնետեր: Եթե ավելի հետեւողական դիտարկում արվի, ապա պետք է փաստել, որ «Արցախբանկը» փաստացի հանդիսացել է ԽՍՀՄ պետական խնայբանկի ԼՂԻՄ մասնաճյուղի իրավահաջորդը: Իսկ այդ բանկում տասնյակ հազարավոր արցախցիներ պահել են իրենց խնայողությունները: Այսինքն, նրանց բանկային ավանդները ԽՍՀՄ փլուզումից հետո տնօրինել է ԼՂՀ կառավարությունը՝ ստանձնելով ավանդները փոխհատուցելու պարտավորություն:
Ներկայումս ի՞նչ կարգավիճակ ունի «Արցախբանկ» ՓԲԸ‑ն՝ բռնատեղահանված արցախցու համար հնարավոր չէ պարզել: Առհասարակ ի՞նչ գործարքի շնորհիվ է ԼՂՀ «պետական բանկը» վերակազմավորվել նախ բաց, ապա՝ փակ բաժնետիրական ընկերության, ովքե՞ր են բաժնետերերը,- այս հարցերը պետք է բարձրացնի Արցախի «պետնախարար» Նժդեհ Իսկանդարյանը: Ոչ թե հրապարակի «Արցախբանկի» նվիրատվության նվաստացուցիչ չափը: Ի՞նչ անի բռնատեղահանված արցախցին, «Արցախբանկ» ՓԲԸ‑ի «կառավարչի» եւ բաժնետերերի համար եկեղեցում մոմ վառի՞, հանապազօրյա աղոթի նրան արեւշատության համա՞ր, որ այդքան «գթասիրտ եւ մեծահոգի են»: Արցախի «պետնախարարն» անոնսավորել է, որ ապրիլի սկզբից «փողոցային շարժում է սկսելու»: Հանուն ինչի՞:
Վահրամ Աթանեսյան