Հիբրիդային գրոհների դեմ պայքարին աջակցելն ու հիբրիդայի գրոհներ զարգացնելը տարբեր բաներ են, ու ԵՄ‑ի գործունեությունը, ընդհակառակը՝ Հայաստանի քաղաքացուն հիբրիդային գրոհներից պաշտպանելն է, ու սա միջամտություն անվանել չենք կարող:
Ալխաս Ղազարյան
«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Ալխաս Ղազարյանը
– Օրերս ՀՀ արտաքին հետախուզության ծառայությունը տարածել է տեղեկատվություն այն մասին, որ այլ երկրում տվյալ երկրի հատուկ ծառայությունների անունից հանդես գալով, տարբեր դերակատարներ փորձում են ճնշում գործադրել հայազգի և ՀՀ քաղաքացի հանդիսացող ու տվյալ երկրում տնտեսական գործունեությամբ զբաղվող անձանց նկատմամբ՝ վերջիններիս մղելով Հայաստանում սպասվող խորհրդարանական ընտրություններին մասնակցության հայտ ներկայացրած քաղաքական որոշ ուժերին աջակցելու գործողություններ իրականացնելուն։ Տիկի՛ն Ղազարյան, ինչպե՞ս եք գնահատում հայտարարությունը, ի՞նչ մեխանիզմներով եք պատրաստվում կանխել նմանատիպ միջամտությունները:
– Հայտարարությունը վկայում է այն մասին, որ ինստիտուտները բավական օպերատիվ են աշխատում, որովհետև հայտնաբերել նման դեպքեր ու այդ ամենի վերաբերյալ հայտարարություն տարածել արդեն իսկ լավ է: ՆԳՆ‑ն նաև հայտարարել է, որ նման դեպքերի վերաբերյալ կլինեն կոնկրետ քայլեր, ու Քննչական կոմիտեի հայտարարությունն էլ կա, որ որոշ շրջանակներ, որոնք արտաքին ուժերի կողմից են կառավարվում, անցնում են այն հոդվածներով, որտեղ հավաքներին նյութական շահագրգռվածության հիմքով մարդիկ են տարել, որպեսզի ցույց տան, թե ունեն հանրության աջակցությունը, բայց իրականում գումարի դիմաց են տարել, ու Քննչական կոմիտեն էլ արդեն բացահայտված գործ ունի այդ մասով:
– Ստացվում է, որ հիմնարար փաստերի առկայության դեպքում հնարավոր է, որ այս հարցերը տեղափոխվեն իրավական հարթությո՞ւն:
– Իհարկե, հարցը միանգամից գնալու է իրավական դաշտ, որովհետև այդ դաշտում լուծվող հարց է, ու շատ դրական եմ գնահատում այն, որ արդեն ՆԳՆ‑ն էլ այդ զգոնությունը ունի, ու Արտաքին հետախուզության ծառայությունն էլ կարողանում է ժամանակին աշխատել ու նման հայտարարություն տարածել, սա նշանակում է, որ տիրապետում են իրավիճակին:
-Կան նաև կարծիքներ, որոնք այս հայտարարությունները լիարժեք արժանահավատ չեն համարում կամ, նույնիսկ եթե ընդունում են դրանց արժանահավատությունը, հարց են բարձրացնում, թե ինչու նույն կառույցները չեն արձագանքում Հայաստանի ներքին կյանքում ԵՄ‑ի, Թուրքիայի, Ադրբեջանի կամ ԱՄՆ‑ի հնարավոր միջամտություններին։
– Ես փաստական հիմքերով ասացի, որ Քննչականում կա արդեն հարուցված գործ, իսկ, օրինակ՝ ԵՄ‑ի ազդեցությունը, միջամտությունը ինչպե՞ս են արտահայտվում, ոչ մի ձևով: Եթե իրենք նկատի ունեն, որ հիբրիդային պատերազմների դեմ պայքարելու համար ֆինանսական աջակցություն է տրամադրվել, ապա դա լրիվ այլ բան է: Հիբրիդային գրոհների դեմ պայքարին աջակցելն ու հիբրիդայի գրոհներ զարգացնելը տարբեր բաներ են, ու ԵՄ‑ի գործունեությունը, ընդհակառակը՝ Հայաստանի քաղաքացուն հիբրիդային գրոհներից պաշտպանելն է, ու սա միջամտություն անվանել չենք կարող: Ինչ վերաբերում է այն երկրների միջամտությանը, որոնք դուք թվեցիք, առհասարակ, աբսուրդի ժանրից եմ համարում, նման ազդեցություն ես չեմ տեսել, չեմ էլ պատկերացնում:
– Տիկի՛ն Ղազարյան, «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը հրապարակում է արել, ըստ որի «Անկախ դիտորդը» հանցագործության մասին հաղորդում է ներկայացրել Դատախազություն‘ ՔՕ 233-րդ հոդվածով (կուսակցություններին ֆինանսավորելուն պարտադրելը), որ Ռուսաստանից միկրոավտոբուսներ են բերում՝ մարդկանց մասնակցությունը ընտրություններին ապահովելու համար:
– Այո-այո, ես ծանոթ եմ գրառմանը, մենք այս մարդկանց առումով իրապես հանգիստ ենք, թող մեր հայրենակիցները բարով գան ու բարով մասնակցեն ընտրություններին, բայց ես կարծում եմ, որ մարդը երբ գա Հայաստան, մտնի իր գյուղ, թաղամաս, տեսնի, թե մենք ինչ փոփոխություններ ենք արել, որոնք չեն արվել 30 տարի, ու երբ այդ մարդը իր մեջ իր արտագաղթի պատճառները վերլուծի, վստահեցնում եմ, որ ավելի շատ տուժելու են այդ քաղաքական ուժերը: Քաղաքացին, մտնելով իր համայնք, ակնհայտ տեսնելու է կատարված փոփոխությունները ու իր քվեն տալու է գործող իշխանությանը:
– Տիկի՛ն Ղազարյան, քանի որ կոնկրետ հայտարարության մեջ նշվում է միջամտող երկիրը, կարո՞ղ ենք ասել, որ թիրախում Սամվել Կարապետյանի քաղաքական թիմն է, որովհետև ինչպես ընդդիմության որոշ շերտեր ասում են՝ իշխանությունն իրապես վախեր ունի Կարապետյանի թիմից:
– Մենք իրապես վախ չունեք որևէ մեկից, որևէ քաղաքական թիմից, ես չեմ կարող մեկին նշել, որովհետև բոլորը գործում են նույն տիրոջ համար, բոլորն աշխատում են կոնկրետ մեկ կենտրոնի համար, բոլորը միասին են, մի թելով են կապված ու մեկ մարդու են ծառայում, մեկ ազդեցության են ենթարկվում:
– Եվ այդ մեկ տերը Ռուսաստանի Դաշնությո՞ւնն է:
– Իրականում՝ այո՛, որովհետև մենք այս պահին այդպես ենք տեսնում:
– Այդ դեպքում, եթե Ռուսաստանից ռիսկեր եք տեսնում, ինչո՞ւ եք շարունակում խորացնել կապերը այդ պետության հետ:
– Մենք բոլոր պետությունների հետ ենք կապեր հաստատում, հարաբերություններ զարգացնում, մենք առաջնորդվում ենք մեր պետության շահով, բայց այդ պետություններն էլ պետք է հասկանան, որ մեր ներքին քաղաքական կյանքին խառնվել պետք չէ, մենք միշտ աշխատելու ենք ի շահ մեր պետության:
– Հնարավո՞ր է, որ այս հայտարարությունների, եղած հիմքերի հիման վրա որևէ կուսակցություն չգրանցվի ընտրություններին մասնակցելու համար:
– Դա արդեն համապատասխան մարմինները պետք է գնահատեն, մենք որևէ խնդիր չունենք որևէ կուսակցության գրանցման կամ չգրանցման մասով, մենք հենվելու ենք ՀՀ քաղաքացու ողջախոհության ու գնահատականի վրա: Մենք որևէ ուժից մտավախություն չունենք, մենք ուզում ենք ընդամենը պաշտպանել մեր ժողովրդին խաբվելուց, Գյումրի երկրորդ սցենարի կրկնությունից, որ քաղաքացիների ձայները չստանան ու տան ուրիշին:
Աղբյուրը՝ https://medialab.am/313471/