Գարեգին Նժդեհի թեման ամենից հարմարն է, որով ռուսներն ու ադրբեջանցիները փորձում են քաղաքական հարվածներ հասցնել հայերին:
Հակոբ Բադալյան
Օրը Նվեր Մնացականյանի հետ հաղորդաշարի շրջանակներում հյուրընկալվել է քաղաքական վերլուծաբան Հակոբ Բադալյանը;
Զրույցն ընթացել է նախ օրեր առաջ Մոսկվայում հայկական բանակի 30-ամյակին նվիրված միջոցառման ժամանակ Գարեգին Նժդեհ Ֆիլմի ցուցադրության մասին: Ինչպես հայտնի է, բավական մեծ աղմուկ բարձրացավ այս թեմայով և սկսվեցին քաղաքական շահարկումները: Լուրեր տարածվեցին, որ այդ ֆիլմ իրավապահներն արգելել են համաձայն ՌԴ օրենսգրքի, քանի որ Նժդեհը համարվում է նացիստ, հետո էլ լուրեր եղան, որ այդպիսի բան չի եղել, հետո խոսեց անձամբ Ալիևը:
Վերլուծաբան Հակոբ Բադալյանը նշեց, որ Գարեգին Նժդեհի թեման ամենից հարմարն է, որով ռուսներն ու ադրբեջանցիները փորձում են քաղաքական հարվածներ հասցնել հայերին: Ի պատասխան Նվեր Մնացականյանի այն դիտարկմանը, որ գուցե Գարեգին Նժդեհն այնքան հզոր կերպար է, որ մինչև հիմա նրանից մի տեսակ ներքին վախ կա, Հակոբ Բադալյանն ասաց, որ ինքը շատ ուրախ կլիներ դրա համար, բայց Նժդեհը առիթ է, որպեսզի հերթական անգամ քաղաքական շահարկումներ սկսվեն:
Ընդհանրապես սա նոր թեմա չէ: Դեռևս տարիներ առաջ էլի կրքեր էին բորբոքվել Նժդեհի թեմայով, հատկապես ՀՀ մայրաքաղաք Երևանում արձանի տեղադրման փաստով: Այն ժամանակ դեռ ՀՀ նախագահ Սերժ Սարգսյանը հայտարարեց, որ համապատասխան պատմական տեղեկագիր է պատրաստվում ռուսներին ուղարկելու համար, բայց ռուսներն իրենց կարծիքը չփոխեցին՝ Զախարովայի բերանով ասելով իրենց կարծիքը:
Բալադյանը նշեց, որ Ռուսաստանի հայերը շատ լավ պիտի հասկանային, որ հենց այդպես էլ պիտի լիներ: Ադրբեջանցիները ոչ մի առիթ բաց չեն թողնում, և իրենք պիտի կանխատեսած լինեին, որ այդ ֆիլմի ցուցադրությունը նման հետևանքների է հանգեցնելու: Հակոբ Բադալյանը տարակուսեց, թե ինչու կանխարգելիչ քայլեր չեն ձեռնարկվել:
Ռուսներն ու ադրբեջանցիները չեն կարողանում մարսել, որ Հայաստանում ուրիշ ռեժիմ է հաստատված և ամեն կերպ հարվածն իջեցնում են հենց այդ ռեժիմի ու նաև Հայաստանի գլխին: Տեղեկատվական այդ այլանդակությունն այս անգամ նախ տարածեց Ռեգնում գործակալությունը, իսկ Ալիևն էլ հետո մտավ դերի մեջ՝ փորձելով հակաֆաշիստական հերոսի դեր տանել:
Հակոբ Բադալյանը նաև նշեց, որ ներկայիս ընդդիմությունը, որ բաղկացած է նախկին իշխանավորներից, հիմա լրիվ ազատ է Նժդեհին պաշտպանելու հարցում և կաշկանդվածություն չունի:
Զրույցի ընթացքում նաև շոշափվեց «Պատիվ Ունեմ» դաշինքի պատգամավոր Հայկ Մամիջանյանի կողմից հայկական բանաձևին դեմ քվեարկելու հարցը: Վերլուծաբանը նկատեց, որ դրանով ընդդիմությունը լավ շանս տվեց, որ իշխանությունը հարվածի իրենց: Հիմա Հայաստանում իշխանությունն ու ընդդիմությունն ավելի շատ իրար հարվածելով են զբաղված:
Անդրադարձ կատարվեց նաև Սերժ Սարգսյանի ասուլիսին: Նվեր Մնացականյանը հարցրեց, թե արդյո՞ք ավելի լավ չէր լինի, որ բոլորը բացեին բանակցային իրենց ժառանգությունը և պարզ դառնար, թե ինչ-որտեղ-երբ: Հակոբ Բադալյանը նշեց, որ դա լավ կլիներ, բայց կա նաև այն վտանգը, որ առայժմ անձնական ամբիցիաներով են առաջ շարժվում և բանակցային ժառանգության քողազերծումը ոչ թե մաքուր դաշտ կբերի, այլ ավելի մեծ շահարկման ռիսկ:
ՀՀ նախագահ Արմեն Սարգսյանի հրաժարականի մասին Հակոբ Բադալյանը միանգամայն պարզ նշեց, որ նախագահը հայտնվել էր մի վիճակում, երբ իր դիրքը պահելու համար կամ պիտի պայքարեր իշխանության և ընդդիմության դեմ, կամ դառնար այդ թիմերից որևէ մեկի անդամ, ինչն անընդունելի էր նրա համար: Ստեղծված վիճակում Արմեն Սարգսյանն արել է ամենա սպասվող քայլը, իսկ թե ինչու է հենց այս պահը ընտրել հրաժարականի համար, դա հենց ինքը Արմեն Սարգսյանը պիտի ասի:
Հարցազրույցն ամբողջությամբ՝ YouTube.com