Մենք հանդես ենք գալիս որպես պետական մտածողության հարթակ՝ մի նպատակով․ Հայաստանի
պետականության ամրապնդում և նրա լիարժեք վերադարձը եվրոպական քաղաքակրթական համակարգ։ Մեր
համար սա ոչ թե աշխարհաքաղաքական լոզունգ է, այլ քաղաքակրթական ընտրություն՝ հիմնված
բանականության, իրավունքի, ազատության և արժանապատվության վրա։
Մենք հետևողականորեն լուսաբանում և վերլուծում ենք Հայաստանի ներքին ու արտաքին քաղաքական
զարգացումները, միջազգային արժևորման գործընթացը, ինքնիշխանության ամրապնդման ուղիները և
տարածաշրջանային ապաշրջափակման շուրջ ընթացող քաղաքական, տնտեսական ու անվտանգային
քննարկումները՝ բացառապես պետական շահի և երկարաժամկետ հեռանկարի դիրքերից։
Մեր հարթակը նաև տարածաշրջանային դիտակետ է․ մենք հետևում ենք հարևան երկրների և ամբողջ
տարածաշրջանի զարգացումներին՝ հասկանալու ոչ միայն վտանգները, այլև հնարավորությունները, որոնք
կարող են ծառայել Հայաստանի ուժեղացմանը։
Մենք հատուկ պատասխանատվությամբ ենք աշխատում սփյուռքահայության հետ՝ փոխանցելով ճշգրիտ,
փաստացի և ապատեղեկատվությունից զերծ բովանդակություն։ Մենք շեշտադրում ենք հայրենադարձության
անհրաժեշտությունը՝ ոչ որպես կարգախոս, այլ որպես ազգային վերականգնման և պետական կայացման
առանցքային պայման։ Կարևորում ենք Սփյուռք-Հայաստան տնտեսական և մշակութային գործընկերության
խորացումը՝ որպես համահայկական ներուժի համախմբման գործիք։
Միջազգային լսարանի հետ խոսելու համար մենք ընդլայնում ենք անգլերեն հրապարակումները՝
Հայաստանը ներկայացնելով որպես ինքնիշխան, բանական և քաղաքակրթական ընտրություն կատարած
պետություն։
Մեր հարթակը կենտրոնանում է հայրենակենտրոն մտավորականների, փորձագետների և հեղինակավոր
մասնագետների վրա՝ ձևավորելով մի խոսք, որտեղ գերակայում են գիտակցությունը,
պատասխանատվությունը և պետություն կառուցելու կամքը։ Մենք չենք սահմանափակվում
իրադարձությունների արձանագրմամբ․ մենք ձգտում ենք ձևավորել մտածողություն, դիրքորոշում և
հանրային պահանջ՝ հանուն ուժեղ, ինքնիշխան և եվրոպական Հայաստանի։