Հուսահատության հիմք չկա։ Արդարադատությունը կիրականացվի, և շղթայի բոլոր պատասխանատուները, այդ թվում՝ նախկին նախագահ Սերժ Սարգսյանը և մյուս բարձրաստիճան պաշտոնյաները կկանգնեն օրենքի առաջ։
Անուշ Քլոյան
1inTV‑ն զրուցել է ԱԺ ՔՊ խմբակցության պատգամավոր Անուշ Քլոյանի հետ։ Զրույցի ընթացքում քննարկվում է 2008 թվականի Մարտի 1‑ի ողբերգական իրադարձությունների շուրջ ծավալվող նոր իրավական զարգացումները և բարձրաստիճան նախկին պաշտոնյաների, մասնավորապես՝ Հովհաննես Թամամյանի ձերբակալությունը: Քննարկման առանցքում է Մարդու իրավունքների եվրոպական դատարանի վճիռը, որը պարտավորեցնում է Հայաստանին բացահայտել տասը զոհերի մահվան հանգամանքները և պատասխանատվության ենթարկել բռնություն հրահրած հանցավոր շղթայի բոլոր օղակներին:
Անուշ Քլոյանը, անդրադառնալով Մարտի 1‑ի գործով վերջին զարգացումներին, նշեց, որ 17,5 տարի անց հրապարակված ՄԻԵԴ վճիռը հստակ արձանագրել է՝ 2008 թվականի մարտի 1‑ի ցույցերը եղել են խաղաղ, ցուցարարների մոտ զենք կամ զինամթերք չի հայտնաբերվել, իսկ պետությունը կիրառել է բիրտ և անհամաչափ ուժ։
Քլոյանի խոսքով՝ այդ վճռով ընդգծվել է, որ գործել է համակարգված շղթա, և շղթայի բոլոր օղակները՝ հրաման արձակողներն ու դրանք կատարողները, պարտավոր են կրել պատասխանատվություն։ Նա դիտարկում է, որ անկախ նրանից, թե որ իշխանությունն է տվյալ պահին կառավարում, պետությունը պարտավոր է կյանքի կոչել այդ վճիռը և ապահովել մեղավորների պատասխանատվությունը։
Պատգամավորը նշեց, որ վերջին մեղադրանքներն ու ձերբակալությունները, այդ թվում՝ Հովհաննես Թամամյանի նկատմամբ, վկայում են, որ գործընթացը շարունակվում է։ Նրա համոզմամբ՝ առաջիկայում հնարավոր են նոր բացահայտումներ, և բոլոր նրանք, ովքեր ներգրավված են եղել բռնությունների, ծեծի և սպանությունների մեջ, անպայման կկրեն իրենց արժանի պատիժը։
Անդրադառնալով երկրորդ նախագահ Ռոբերտ Քոչարյանի պատասխանատվության հարցին՝ Քլոյանը կարծում է, որ գերագույն գլխավոր հրամանատարը չէր կարող անտեղյակ լինել Երևանում տեղի ունեցող իրադարձություններից։ Նրա գնահատմամբ՝ հրամանները փոխանցվել են վերևից ներքև, և պատասխանատվությունը չի կարող շրջանցվել։ Նա համոզմունք հայտնեց, որ Քոչարյանը չի խուսափի պատասխանատվությունից։
Անուշ Քլոյանը նաև շեշտեց, որ դատարաններն անկախ մարմիններ են, և գործերի ընթացքը պայմանավորված է ապացույցների բազայով։ Նրա խոսքով՝ նախորդ տարիներին բազմաթիվ իրեղեն ապացույցներ կոծկվել կամ խեղաթյուրվել են, ինչն էապես բարդացրել է քննությունը։ Քլոյանը նշեց, որ ՄԻԵԴ‑ն արձանագրել է նաև պետության կողմից ոչ լիարժեք համագործակցություն և ապացույցների չտրամադրում։
Պատգամավորը կարծում է, որ դատախազությունը, հակակոռուպցիոն և քննչական մարմինները շարունակելու են գործի քննությունը, և գործնական փուլ մտնելուց հետո վկաների ցուցմունքները կարողեն էական ազդեցություն ունենալ։ Նա ընդգծեց, որ հասարակության սպասումները բարձր են, և քաղաքացիները հաճախ հարցնում են՝ ինչու մեղավորները դեռ ազատության մեջ են։
Քլոյանի գնահատմամբ՝ հուսահատության հիմք չկա։ Նա վստահություն հայտնեց, որ արդարադատությունը կիրականացվի, և շղթայի բոլոր պատասխանատուները, այդ թվում՝ նախկին նախագահ Սերժ Սարգսյանը և մյուս բարձրաստիճան պաշտոնյաները, կկանգնեն օրենքի առաջ։
Պատգամավորը չի բացառել, որ նոր զարգացումներ և հնարավոր պատասխանատվության ենթարկումներ կարող են լինել նաև մինչև ընտրությունները՝ նշելով, որ գործընթացը շարունակական է, և զոհերի ընտանիքների երկարամյա սպասումը պետք է ավարտվի արդար վճռով։
Հարցազրույցն ամբողջությամբ՝